JESUS MAKES LAZARUS LIVE

 Lesson 20: JESUS MAKES LAZARUS LIVE

                                   (Johan 11:1-44)

ZEISU NUNTAKNA APIA THEI PA!

Johan 11:25

     … “ Keimah in a sisa mite thosakin a hingsak thei pa ka hi hi.Kei hong um mi peuhmah asih hangin nungta ding hi.”

    Khat veivei ciang Pasian nasep na te kitel zolo a, adiakdiak in haksat na khat peuhpeuh I tuahciang bang a ci ahi tam Pasian in kei hong mangngilh maw hong thu don kei si e i cih hun nangawn om hi.Ahi zongin tua banghun ciangin Pasian in hong mangngilh hilo in ei ading ahoih zaw onggelsak na hi zaw thei hi.

     Khat vei Bethany khua ah Mary,Matha le Lazarus a kici unau khat om hi.A upa uh Lazarus pen Zeisu Lawm hi a, Zeisu amau khua ah a paisim in amau inn ah zintung den hi.Khatvei Lazarus a cina in gim mahmah hi.

     Tua ciangin amau te in kamtai khat sawl in, “ Topa aw na it mipa a cina hi,”a cisak hi.

       Ahi zongin Zeisu in tua thu azak ciangin, “Hih natna pen sihna ding natna hi lo a,Pasian’ Tapa in Pasian pianzia aneih na mite in a theih nading le Pasian a phat theih nadingin a na ahi hi,” a ci hi.(Johan 11:4)

     Zeisu Lazarus kiang apai in adamsak tan?Lazarus cinatna pen Pasian vanliatna aki lat nading a cih bang a cih nop na a tam?

       Zeisu in Lazarus te unau it mahmah hi. Ahi zongin a cinat azak khitteh paipih lo-in tua lai ah ni nih tam lai veve hi.

     Tua ciangin Zeisu in a nungzuite kiangah, “ I lawmpa Lazaras ihmu zo hi.A hi zongin amah aphong dingin ka pai ding hi.” a ci hi.Tua ciangin a nungzui te in, “ Topa aw amah ihmu a hih le a nuamtuam hi ta ding hi.” a ci uh hi.A hi zongin Zeisu in m, “Lazarus si khin ta hi.Ahi zongin note in na up theih na dingun tua lai ah kei om kha lo ka hih manin note kongkhual na in ka nuam mahmah hi.A hi zong in tu-in a ma kiangah va pai ni” a ci hi.

  Zeisu in alawm it Lazarus damsak theilo maw? Banghang a sih ngak sese a hi tam? banghang a cinat azak a paipah a damsak lo? Dot na tampi om hi.Khat veivei ciang i nuntak na ah zong tuadan mah,Pasian in kei hong mangngilh maw ci-in dotna zong om thei Pasian in nang hong mang ngilh ngeilo a,nang ading ahoih zaw agel na hi zaw hi.

      Bethany khua ah Zeisu a tun ciang in Lazarus a ki vui zaw ni li phá ta hi. Jerusalem panin zong sigal dingin Jew mi tampi zong hong pai uh hi.

      Zeisu hong pai nathu Martha in azak ciangin adawn dingin vapai kha a, Mary ahih leh a inn mah ah om lai hi.

       

    Matha in Zeisu kiangah, “ Topa aw hi lai ah a om hole cin ka u si hetlo ding hi.Tu nangawn in na nget peuhpeuh Pasian in hong piak ding ka thei hi,” a ci hi.Zeisu in “na u hong tho kik ding hi.”a cih le Martha in, “Ni tawpni a, thawhkik ni ciang in hong thawhkik ding ka thei hi.” a ci hi.

    Tua ciangin Zeisu in, “ Keimah in a si sa mite thosak in a hingsak thei pa ka hi hi.Kei hong um mi peuhmah a sih hangin nungta ding hi.A nungta a kei hong um mite si ngei nawnlo ding hi.hih thu na um hiam?”a cih ciangin, “ka um hi Topa aw; leitung ah ahong pai ding Pasian Tapa Khirh na hihna ka um hi.” ci-in a dawng hi.

   Mary le Martha in Zeisu bang hang ka u cinat lai a hongpai in damsak lo a hi hiam ci-in ngaihsun kha ding hi. A hi zongin amau Zeisu umin a thuciam te muangin na khat peuhpeuh hong piang ding ci-in thei hi.

   Tua ciangin Martha a inn ah vatai in a naunu Mary kiangah, “ Siapa hong pai a nang hong sam hi,” a ci hi.

 Mary zong tai pah vingveng in Zeisu om na ah va pai hi. Midang te in Mary hanah pai in a vakap ding hi inteh ci-in amah a zui uh hi.

    Zeisu om na ạ Mary a tun ciangin ama khe mai ah bok a, “ Topa aw, nang hong om hi lecin ka u si het lo ding hi,” ci-in akap hi.

Tua ciangin Zeisu in, “koi ah vui na hi uh hiam?”a ci hi. Amau te in, “Topa aw hong pai inla hong en in,”a ci uh hi. Tua ciangin Zeisu zong a kap hi.Amau te in Zeisu in Lazaras nak it mahmah hi a ci uh hi.Pawlkhat te in,“mittaw te khua amusak thei hih mipa in amah asih loh nadingin bawl theilo ahi hiam?”a ci uh hi.

        

     Zeisu hong dah mahmah Kim ahih manin a ki vui na han kong ah hong pai hi.A phual a tun ciangin, “Suangtum lakha un,”a ci hi.

 Misi pa naunu Martha in, “ Topa aw, aki vui zawh ni li phakhin a hih manin uih ta ding hi,” a ci  leh Zeisu in, “ Na up nak leh Pasian vangliatna na mu ding hi, ci-in hong gen khin hilo ka hi hiam?”aci hi.Tua ahih man in a suangtum a likkhia uh hi.

   Zeisu zong vanlam dak to-in, “Pa aw,ka thungetna hong ngai na hih manin ka nuam mahmah hi.Ka thu ngetna na hong ngaih tawntungna thu ka thei a, ahi zong in hih lai ah a om mite in kei na hong sawlna thu a up theih na dingun tu-a bangin kam a hong pau ka hi hi,”a cih khit ciangin nakpi tak in kiko-in, “Lazarus aw hong pusuak in,”a ci hi.

     Tua ciangin a misi pa khut a khe dial tawh kitun in, a mai tang puan tawh aki tun sa-in hong pusuak hi.

      Zeisu in amaute kiangah, “ adial le puante phelkhia un “ a ci hi.    

     Zeisu in Lazarus te unau it mahmah hi. Lazarus cinat lai a apaipah loh zong Pasian vangliat na miten a muh theih na ding a hihi. Nang le kei zong Pasian in hong it mahmah a ama vangliatna le a ma hih theihna zong i muhtheih a i tel thei ding hong deih hi.

    Zeisu mahmah zong eite hong itluat manin amah hong kipia tawmin eite mawhna tangin sihna hong thuak in hansungah ki vui a,a nithum ni in hong tho kik hi.

 Bang zah a Pasian hong itna lian hiam?

   Leitung ah haksatna natna te om ahi zongin Zeisu in eite ading omna hong bawlkhol sak a tua mun ah Pasian eite tawh atawntung inmangkhawm in nuamsa ding hi hang.Tua pen Pasian hong kamciam hi la eite in um in asam ding ahi hi.Leitung ah haksatna mawhna gitloh na tawh kidim ahih hang tua te khempeuh Pasian ukna sungah om ahih manin lungmuang tak le nuamtak a i nuntak ding a hi hi.

1.Lazarus te unau khua koi teng?

2.Lazarus in sanggam numei nih nei Tua te min bang?

3.Zeisu in Lazarus cinat a zakciang paipah hi.(No)

4.Lazarus aki guizawh ni bangzah ciang kinungta sak kik?