JACOB LE ESAU

 LESSON:6 THUMAN ADEIH PASIAN 

                         JACOB LE ESAU

                        (Pian 25:19-34, 27)      

Sinsaknop:Thuman ding citak ding.

Kamngah:

Paunak 3:3

Thumanna le cihtakna khahsuah ngei kei  inla, na ngawngah tuate okin, na lungtang tungah gelh in.

Nung a i sinsa Abraham tangthu kuan thei lai?Abraham pen Pasian in agam pan, alawmte a nu apa te kiangpan Caanan gam aluah ding a samkhia ahi na?Abraham in Pasian thumang in azi Sarah le a sanggampa ta Lot tawh paikha uh hi ven maw.

Tuaciang Abraham le Sarah te in a tek mahmah khit uhciang tapa khatnei a min nathei lai uh hia?( Isaac). Isaac ong gol in Rebekah minnei zi khat hong nei  mete.

Tuni pen Isaac le Rebekah te thu sinding hi hang. Amaute a kiteh uh zong hongsawt pianta ahih hang amau tanei nailo.

Tua le Isaac in Pasian kiang ta hongpia in cin thungenin tua zawh asawlo a Rebekah onggai in tapeng (twins) hong nei in ah, a u zaw pa min pen Esau ci-in anau zawpa min Jacob amau tenih pen apeng ahih uh hang kibang vetlo Esau thagol in mulhau in aman gamlakah sabet (hunter) ut mahmah, Jacob ahih leh acinel in hat melkhol lo amah pen innah om hithiat.

Tua leh nikhat Esau gamlak a, a sabet na pan gilkial mahmah sa a ong ciahin inn atun ciang a naupa Jacob in meh na huanin tua leh a man Jakob ka gilkial lua na mehhuan kuangkhat hong pia in acih leh Jacob in kameh naduh le na innluah za (gamh)tawh kikhek ni ci.Gamh a cih nathei uh hia?Nu le pa te tungpan,Unau sungah a upen te ngahding hamphatna neih le lam te cihna.Adang khat in ci leng Nu le pa te sihkhit ciang neihsa teng a tangding innkuan sungah thunei pen thu vanpi zong hi pah.

No bang ci sa, Meh kuang khat leh gamh (inherited)kikhek ding?

Jacob thuman nasa uh hia? Pasian in ei phattuam nading bek ngaihsun a midang te I hehpih loh ding hongdeih lo, khat le khat kikhual a ki huh diamdiam ding hong deih.

Esau zong a gilkial lua ahih cianga, “aw! tun kagilkial lua si dektak ka hih manin manlangin na meh ong pia in la keingah ding gamh khempeuh tangin” ci ta.Jacob in a upa gamh ding teng a man ngah.

Tua zawh kum tawmkhat khitciang apa uh Isaac zong tek ta a,amit in khuamu nawnlo hi.Amah in Esau samin, “ En in, kei ka teek hi.Tua ahih ciangin gamtakah pai-in kei adingin sa va beng  in. Kasih ma-in nang thupha kongpiak theihna dingin kei’ duh bangin anlim hong bawl inla, ka nek dingin hong paipih in ,”a ci hi.

Esau zong sabeng dingin paikhia pah hi. Ahi zongin anu  Rebekah in Jacob samin  “ Enin thupha nangah theihna dingin kong sawl bangin gamta in,napa duh ding meh ibawl dinghi.na u Esau puansilh inla, Esau ki neih in napa meh vapuak in. Tua hileh napa thupha  nangah ding hi.Napa in nang pen na upa mah hongsa lel ding hi.” aci hi.

Jacob in Esau puan la-in silh a a nu-in meh a bawl khitciang in Jacob in “ nu ka sanggampa in mulhau a kei cinel nam  ka hih manin ka pa in hong lawngkha leh kakhem lam hong thei dinga  kei’ tungah thupha hilo samsiatna hongpia zawsop ding hi.”acih ciangin anuin, “nangtungah hong tungding siatna khempeuh keitung ah hongtung tahen.”a ci hi.

Anu in kel vunte la in Jacob ngawng teng le akhut tengah a silhsak hi.

Jacob le anun apa uh Isaac khem zo-in na um uh na?

Tua ciangin Jacob zong apa khemdingin a nutawh a bawlsak uh meh kuangkhat tawi in apai hi.

 Apa kiangah, “ pa aw kamatsa meh hong bawling ne in ka thupha hongpia in,”a ci hi.Apa in, “ hongtung baih sicia” acih ciangin, “Pasianin ong tuahpha sak hi.” Ci-in khem sawnsawn lai hi.

Apa in, “ kong lawn theih nadingin ka kiangah hong nai in,” acih ciangin a man zong nehphei a, apa in alawn ciangin, “ aw kata na aw Jacob aw tawh kibang ahiang kong lawnciang namul te om ahih manin Esau taktak mah hi teh maw, a ci hi. 

Tua ciangin Isaac in, ka ta aw thupha ongpia ing,Pasian in nang thupha hongpia henlanasanggam te auk pa hi inla,a mau te suan le khak te na mai ah hongkun hen.” a ci-in thupha apia hi.

Apan’ thupha apiak khit ciangin Jacob hong pusuak a, tua zawh asawtlo in Esau mehkuang khat tawh apa kiang hongpai in, “Pa hitak ah gamsungpan ka mat sa limci pen nangma duhdanin bawl in kong paipih hi. Tu-in ne inla thupha hongpia in aci hi.Tua ciangin apa in lamdang sak na tawh, “den mah in na sanggam pa Jacob khemna tawh hongpai in amah thupha ka pia khin hi.” a ci hi.

Esau in, “ pa kei ading e,” ci-in kap a “ keizong thupha hong pia in” a ci hi.

Apa in, “ Nang ading om nawnlo hi nasanggam pa tung ah kipia khin ta hi.”a ci hi.

Tua ciangin Esau heh mahmah sa in hongpusuak khia a, “ Jacob in ka innluah za leh kathupha teng hong sutkhin hi.kapa sihkhit ciang in Jacob ka that dinghi.” a ci hi.

Tua thu a nu uh Rebekah in azak ciangin Jacob samin,“tu-in nasanggam pa in hong mudah mahmah in that hong sawm hi. Tua ahih manin hi mun panin  na tai kul ding hi.”a ci hi.Tua ciangin Jacob zong manlang tak in kithawi in  pah hi.

Bang hang Jacob tai pah?

Amah lau hi ven. Bang hanghiam cih leh asanggam pa tungah itna nei lo in a ma ading bek ngaihsun.Thu man a gamta lo ahih cianga lau hi ven.

Anu in Jacob, “ Tu-in kata aw, ka thu hongmangin. Haran a ka sanggampa Laban kiangah va tai inla, na sanggampa hehna abei mateng tuateng ah va om in” ci-in asawtlo khia hi.

Tu- in hih Isaac innkuan sungah bang thupiang? a innkuan un nop salo gai banghang?Jacob le a nu Rebekah in a mau phattuam nading bek ngaihsun in,apa uh Isaac tungah kheemna  zuauthu azat man hi.Laisiangtho in kheemna zuau gen na deihlo.

Laisiangtho sungah: Tua ahih manin gitlohna, zuauna, kineihkhemna, huaihanna, le gensiatnate na na omsak nawn kei un.(1Peter 2:1) 

1.Isaac le Rebekah te ta te a min bang?

2.Esau le Jacob te bang ki lamsang?

3.Esau in a innluah za bangtawh khek?

4.kua pen in apa thupha ngah lo?

5.Jacob in apa thupha bang ci ngah?

6.Banghang Jacob a innpan tai?