ISAAC LE REBEKAH

 Lesson 5:Prayer

            ISAAC LE REBEKAH

                  (Pian 24:1-28)

Sinsaknop: Thungetna a vangliatna, na khat peuhpeuh na hih ding ciang Topa ap in thungen masa ding.

Kamngah

1 Thessalonika 5:16-18

Lungdam tawntungin, thungen niloh unla, bangbang hongpiang taleh na lungdam na uh Pasian tungah ko tawntung un.Khrih Jesuh tawh kipawlin na nuntakna sung uh ah hih bang zia-in na om ding uh Pasian in a hong deih a hi hi.

Kua teng in thungen ngei?Na bang ading thungen?Na nget khempeuh uh nangah pahpah uh hia?

Khat ong gen leng, ken zong khatvei nakpi tak a thungen “Topa nasep hoih khat ongpia in nasem nuam ing,” cin thungen Pasian in ka thunget hong dawngin nasep hoih khat ngah takpi Pasian kiang i ngette a man hong dawng hi ei.

Tua ahih leh Pasian in i nget khempeuh hong pia pahpah in na um uh na?

Tua leh khat vei leuleu guahzu ziahziah guahzu ziahziah ken guahzuk pen nop salo ka hih ciang a thungen, “Topa ken guahzu nuamsa keng guah hongtheu sak in,” cin thungen deihtak a ngen ahiang guah theu vetlo tam tektek lai tua ciang a kei bek ka heh suak pian.Tua zawh kalkhat khit ciang ka innmai a paak te nosuah in paak zihziah hoihthei lua lopa te zong hingsitset in dum dildial tua in ka lung ongdam sak in ka lungnuam mahmah tua laitak bangphawk ka hiam cih leh a nung nipi a guah zukloh na ding thukanget ka ngahloh pen Pasian in kei ading a hoih zaw a gel a hih lam phawk. Tua dan a khat veivei ciang thunget i ngah loh pen ei a ding Pasian in a hoih zaw onggel sak na hi gige.

Khat veivei ciang Pasian in i nget te ong pia khat veivei ongpia lo.Bang hanghiam cih leh a man ei ading a hoih pen thei hi ven.

Nung nipi a i sin Abram  thu na theilai uh hia?Pasian in Abram kiangah na gam, na beh,le na pa inn panin paikhia in nang kong lahna  gamah pai-in la teng in ci ahi na?Na suan le khak na tu nata te ading in tuagam kong pia hi ci ahi  zongin Abram in ta nei hak lua a tek mahmah khitciang  ta nei pan tua a tapa min pen Isaac.

Tuni i sin dingpen Abraham in a tek mahmah khitciang a, aneih a tapa  Isaac thu sin ding hi hang.Abraham le Sarah in atek nungvua a neih a tapa uh ong golta in a nu Sarah zong  tek lua mahmah ta a, Sarah kum 127 aphak ciang ong si hi.

Tua ciangin Abraham zong teekin a kum tam mahmah ta hi. Abraham in anasem pa samin tu- in, “ kaphei nuai ah na khut koih in Kanaan mite lakah ka tapa zi ding la lo-in keima gam le ka beh te lak ah Isaac zi ding nalak nadingin hong kician in.”ci hi.

A nasem pa in, “A numei in hih gamah hong zui nuam kei khaleh nangma nong paikhiatna gam ah na tapa ka paipih kik ding hiam?”a ci hi.

Tua ciang Abraham in, “ Tua lai ah ka tapa na paipih kik loh ding thei in.”a ci hi.

Tua ciang a nasem pazong kithawi in kalaoh 10 le letsong hoih nono a namkim zong pua in khualzin hong kipan a,Nahor lam zuanin a pai hi.

Nahor hong tungta a, a dangtak( tui duh)a hih manin tuikhuk gei ah hongpai in a tusuk hi. Tua laitak in khuasung panin tuitawi ding nungak te hong pai a muh ciangin Abraham nasem pa in thungen in,

 “ Topa aw tuni in ka maa hong vangsak in thu kong ngen hi.En in tuikhuk gei ah kei ka ding a, khuapi nungak te tuitawi dingin hong pai uh hi.kei mah in tui ka dawn theih na dingin na bel hong ngasuk in ka cih ciangin dawnin,na kalaoh te zong tui ka pia ding hi. Hong ci nu pen na nasempa Isaac ading in aki sehsa numei hi sak in.Nang mah in ka topa tungah itna kip na lahna hih thu tawh ka thei ding hi.,” a ci hi.(Pian 24:12-14)

No e tuabang numei om in na um uh na?A theih ngeiloh khat tui pia ding tuaciang a kalaoh te zong tui piaksak lai ding.

Tua mipan thu a nget khitma in Rebekah a kici nungak melhoih mahmah khat hongpai in tua nu in tuikhuk ah tuidim in hong paitoh ciang Abraham nasem pa in na dawntuah in, “ Dawn dingtui tawmkhat na bel sung pan hongpai dih in,” ci-in va ngen hi.

Tua nu in zong, “ Dawn in ka topa” ci-in tui pia a, “na kalaoh te in zong akham mateng un adawn ding uh tui kong Tawi sak ding hi.” a ci hi.

Abraham nasempa thunget Pasian in a dawng na?Dawng mah mete.Anget dan lian a pia.

Rebekah in kalaoh teng tui apiak khitciang Abraham nasem pan, kham nakbah khat le kham tau nih tua nu tungah letsong in a pia hi.Tua ciangin Abraham nasempa in tua nu tung ah, “ Nang kua na hiam?hong gen in na innah kong tam thei ding uh hiam?”ci- in dong a, Rebekah in, “ kei pen Nahor tapa Bethuel ta nu ka hi hi. Buhkung le ganan a kicing ka nei uh a,giah nading mun zong ka nei uh hi. a ci hi.

Mipa lungdam in Topa tungah lungdam na a ko hi.

Tua ciangin Rebekah te innah pai uh a, inn a tun uhhi. An ne dingin an ki thuk khin hi ahi zongin mipa in, “ ka thu ka genkhit mateng an ka ne kei ding hi.” a ci hi. Rebekah pa Bethuel  in, “ gen in” a ci hi.

Mipa in zong a pai na thu le athu piang teng agen khit ciangin, “Rebekah pen Isaac zi ding hi cih ka thei hi tu-in amah nong zuihsak ding le nong zuih sak loh ding ong gen in” a ci hi.

No bangdan ummawh Rebekah apa ten Isaac zi ding a paisak pah ding maw? paisak lo ding.?

Rebekah sanggampa Laban le apa Bethuel in hih pen Topa’ kiangpan hi ding hi. ci-in Isaac zi dingin paisak ding aphal  uh a, Rebekah dong unla a mah a ut nak leh hi pah hi. a ci uh hi. Rebekah zong thukim a hih manin Isaac zi dingin Abraham nasem pa a zui pah hi.

Isaac zong thu lungngai  dingin gamlak ah pai in a khuadak leh mipa kalaoh te le Rebekah hong pai amu hi.Isaac in zong Rebekah ngai a a mau te nih ki teeng in a ki it mahmah uh hi.

1.Na lunggulh khat a om ciang nang bang hih?

2.Thunget khempeuh i ngah loh bang hang a tam?

3.Abraham nasem pan’ a thunget a ngah hia?

4.A thunget a ngah ciang a man bang  hih kik?

5.Banghang Rebekah a innkuan pih ten Isaac zi ding a phal pah a hi tam?

6.Abraham nasem pan Isaac zi ding bang ci zon?A melhoih zong maw? Thungetna tawh zong?