NAUPANGNO JESUH (Jerusalem Biakinn Paina)

              NAUPANGNO JESUH 

            (Jerusalem Biakinn Paina )

                     Luka 2:39-52

Luka 2:52

  Jesuh a pumpi le a pilna khang a,ama gamtatna in Pasian le mite a lungkim sak semsem hi.          

Jesuh pen Nazareth khua panin hong khangkhia hi.

A pa Joseph lettama (carpenter) hi a hau lua khollo hi.Ahi zongin a neih zah tawh lungkim lungdam tak in nasep thanuam mahmah khat hi a,Jesuh in zong apa nasep ahuh hi.

Laisiangtho sungah, “ Jesuh a pumpi le a pilna khang a,ama gamtat na in Pasian le mite a lungkim sak semsem hi.”ci hi.

Amah pen a pumpi le a kum bek khanglo in a pilna zong khang hi.Nazareth  a om naupang dang te tawh ki bang lo hi.Mi khempeuh in Jesuh it in pakta uh hi.Amau te in , “hibang naupang i mu ngeikei hi Mi khempeuh tawh ki lem in a thunuam, mite kisapna ahuh nuam den naupang hoih pa”ci- in it thei mahmah uh hi.

Kumsimin Jerusalem khua-ah paisan pawi akibawl den a hi hi.Tua paisan pawi pen Israel mite Egypt gampan Pasian in apai khiat pih na phawkna in aki bawl ahi hi.

Jesuh zong kum 12 hong phata a tua paisan pawi ah a nu le apa tawh apai uh hi.
Pawi hun sungteng nuamtak in hun zangin lungdam uh hi. Pawi a ven ciangin a mai khua ciat ah a ciah uh hi.

Mary le Joseph zong amau tenna khua ah ciah uh a, nikhat lam apai khit uh ciangin “Jesuh koi ah om a le!” ci-in kanpan uh hi.Bang hanghiam cih leh amau lak mah ah a om om in ngaihsun uh hi.

Tua ciangin a lawmte lak le a tanau te lak ah zong in ki leh kawikawi in a muh khempeuh tung vuah, “Jesuh na mu kha uh hiam?” ci-in adot uh hangin kuamah in Jesuh mu lo hi.

Amuh loh uh ciangin Mary le Joseph lung kham mahmah uh a,bang cih mawk ding koi ah zong nawn ding ih hi hiam?Jerusalem ah ki leh kik in va zong ni ci-in Jerusalem lam zuan in hong ki leh kik uh hi.

Jerusalem atun uh ciangin mi a muh khempeuh uh dong uh a, mun khempeuh zong kawikawi in buai mahmah uh hi.

Aciah zawh uh a nithum ni ciangin, Biakinn sungah a mah mu uh hi.Amah in Siampi te thugen ngai in thu dongin a maute laizang ah tu-in a om a mu uh hi.Ama thugen aza mi khempeuh in a thu theih na le a dawnkiknate lamdang asa mahmah uh hi.

A nu le apa in zong amah a muh uh ciangin lamdang sa uh a, a nu in, “ka ta aw, banghang in hong hi ci bawl peuhmah na hi hiam?En in na pa tawh lunghimawh mahmah in kong zong uh hi.”a ci hi.

A nu in tua bang a cih ciangin Jesuh in, “Bang hangin hong zong na hi uh hiam?Ka pa na asem ding ka hih lam thei lo na hi uh hiam?”a ci hi.

Ahih hangin Tua teng a om siampi te  in Jesuh gennop thu theilo uh ahih man in lamdang asa uh hi.Amau te in Jesuh eite ong gumkhia ding Pasian Tapa a hih lam a thei kei uh hi. “ Ka Pa”acih vantung Pasian a cih nop na a hih lam theilo uh hi.

Tua khit ciangin Jesuh a nu le apa tawh Nazareth ah ciah khawm uh a, amau te thu amang hi.

Nang zong Jesuh mahbang in nu le pa thumang na hi nuam hiam?Thu hoih khat ah nang zong Jesuh mahbang in thumang, midik hi thei hi teh! Jesuh bang a naupang hoih na hih theih nading in thungen in. Aman na thungen zanuam a zong hong huh nuam hi.

Anu in hih thu khempeuh a lungsim sungah ciamteh a lungdam in ki pak mahmah hi.

*Jesuh in lungdam tak in apa nasep huh den hi.

*Jesuh in a gamtat na tawh mite le Pasian lungkim sak hi.

*Jesuh pen Mi khempeuh tawh ki lemin mi khempeuh in it hi.

*Jesuh pen kikhop ding lawp in Pasian thu kikum nuamsa in Biakinn nuam sa hi.

*Jesuh pen Pasian Tapa taktak hi a, eite mawhna puakhia dingin hong pai a hihi.

*Jesuh in anu  le pa thumang hi.