TUUCINGTE KIANG LUNGDAM NA THU

Luka 2:8-38

Luka 2:11

Tuni-in David khuapi sungah,note a hong honkhia ding Khrih Topa a suak hi.

Zankim laitak in tuucing te-in gamlak ah atuu te uh giahpih uh a, tua zanpen dai dide in gam ui te le gamsa tuamtuam te aw zalo uh ahih manin tuucing te khat in tuni naumtak in ihmu thei ni ei gamdai ei ci-in lungnuam tak in om uh hi.

Khuazing bikbek ahih manin, Amau te in meiphual cih uh a, mei awi kawmin om uh hi.

Tua bangin a om laitak un thakhat in akim uh hong tang pempam a, avek un lau thei mahmah uh hi.

Tua ciangin van tungmi khatin, “ Lau kei un.Mi khempeuh a lungdamsak ding thuthak hoih khat note ading ka hong puak hi.Tuni-in David khuapi sungah,note a hong honkhia ding Khrih Topa a suak hi.Amah natheih nading uh a lim hih bang hi ding hi.Puan tawh kitun naungek khat, gan annekna kuang sungah a ki Sial na mu ding uh hi,”a ci hi.

Tua khit phetin tua vantungmi tawh vantungmi honpite thakhatin hong om in Pasian phatna la sa uh a, “ Van a sang bel na-ah a om Pasian’ min thang hen la, ama pahtak leitung mite tungah nopna om ta hen,” a ci uh hi.Tua ciangin vantung mite vantungah a ciahkik uh hi.

Tuucingte khat le khat lamdang sak na tawh ki-en uh hi.Tua ciangin tuucing te khat in banghang in pai pahlo i hi hiam? “ Bethlehem khua-ah pai-in, Topa’ hong gen hih thupiang va en ni,” a ci hi.

Tua ciangin amau te lakah khat atuu te tawh om in adangteng Bethlehem lam zuanin a tai pah uh hi.

Bethlehem a tun uh ciangin akhua dak kawikawi uh leh ganbuk khat sung a tang zihziah mu-uh hi.Tua ciangin nuam mahmah uh a,agan buk sung ah Khrih Topa om ding cih um uh ahih man in alut pah uh hi.

Asung atun uh ciangin vantung mi gen mah bangin Mary Joseph te le naungek puantawh ki tun in gan annek na kuangsung ah aki sial a muh uh ciangin lungdam lua uh a, vantungmi gen teng a gen kik uh hi.

Hih tuucing te thugen mite in lamdang sa mahmah uh a , Mary in a hih leh alungsim ah ciamteh in a ngaih sun sun hi.Tuucing te in Topa min a phat uh hi.

Jesuh ni giat aphak ciangin Topa tungah naungek a ap dingin Jerusalem ah a paipih uh hi.

Bang hanghiam cihleh Moses thukham sungah, “ Ta pasal masa peuhmah Topa tungah ki-ap ding hi.” ci-in ki gelh hi.Tua tawh ki zui-in biakna-in vakhu nih ahi a,kawl vakhu nih a hi zongin a pia dingin zong apai uh a hi hi.

Jerusalem ah Simeon a kici mikhat na om hi.Israel mite ahonkhia ding Messiah a ngakngak mi khat a hi hi.

Simeon in naungek amuh ciangin Mary kiangah,“Naupang ka tawi thei dia?” ci-in a angah naungek tawi-in Pasian min aphat hi.Tua ciangin amah in, “Topa aw, tu-in leitung mite ahonkhia ding Messiah mukhin ka hih manin kei lungnuam takin kasi thei ta hi.”a ci hi.

Simeon in Mary kiangah, “Hih naungek pen, Israel mite sungah mitampi in siatna angah nading,le mitampi in hotkhiat na angah na ding ahi hi.mitampi in hih naungek nial ding uh a,Mite lungsim tawng akilat na hong hi ding hi.Dahna lungkhamna in nang lungsim mahmah zong hong sunkham ding hi.”a ci hi.