MARY KIANGAH VANVUNGMI HAWH
(Luka 1:26-56,2:1-7)
Luka 1:37
Pasian in abawl theihloh khat zong omlo hi.
Nazareth khua-ah Mary akici nungak khat om hi.Amah pen mikician mahmah khat le Pasian a it mahmah khat ahih manin innsung nasep zong kizen in thanuam hi.
Amah pen Joseph kici tangval khattawh kingai-in asawtlo in kiteng ding zuthawl kipia sa ahi uh hi.
Khatvei innsung teng siangsak in Pasian minphat kawmin a om laitak in vantungmi Gabriel hong pai hi. Vantungmi in Mary kiangah, “ Mi hampha mahmah Mary aw Topa in nang hong ompih a, thupha nangah zo hi,” a ci hi.Mary in vantungmi thugen azak ciangin bang acih nopna hiam,ci-in lamdang sa mahmah hi.
Vantungmi in, “ Mary aw, lamdangsa-in lunghimawh kei in.Pasian mai pha angah na hi hi.Nang gai-in tapa khat nanei ding a, amin Jesuh naphuak ding hi.Amah milian hi ding a, A lian pen Pasian’ Tapa kici ding hi.
Topa Pasian in ama pu David mah bangin kumpi-in bawl ding a,Jacob suanlekhakte’ kumpi hi paisuak ding a,ama ukna bei hun cih om ngei lo ding hi,”a ci hi.
Tua ciangin Mary in, “ Pasal tawh lumkhawm ngeilo ka hih manin hih thu bangci bangin piangthei ding ahi hiam?” a ci hi.
Vantungmi in ama kiangah, “Kha siangtho nang tungah hong tung ding a,Sangpenpa vangliatna in nang a hongtuam ding hi. Tua ahih manin nang sung pan a suak khia ding siangthopa pen Pasian Tapa kici ding hi.En in, na tanaunu Elizabeth in zong a tek nungin tapa khat apai zo hi.Banghang hiam cihleh Pasian aa dingin a piang thei lo na khat beek a om kei hi,”a ci hi.
Tua ciangin Mary in, “ En in, Topa na semnu ka hi hi!Na gen bangin kei tungah hong piang ta hen.” a ci hi.Tua ciangin ama kiang panin vantungmi a pai khia hi.
Vantungmi apai khiat khit ciangin,Mary in ka tanaunu Elizabeth zong naupai ama kiangah vahawh ning cih ngaihsun hi.Elizabeth omna ahi Judea mualtung Gama khua khat ah a va pai pah hi.
Elizabeth inn atun ciangin Mary in Elizabeth hopih pah hi. Tua Mary’ hopih na aw azak ciangin a sunga nau a hong diang hi.
Elizabeth zong Kha siangtho tawh hong kidim a, nakpitakin kiko-in, “Numei khempeuh lak ah thupha ngah pen nu na hi a,Na neih ding naungek in thupha ngah ding hi.Ka Topa nu kei kiangah a hong hawh theih nadingin hih bang hamphatna koipan ngah kha ka hi hiam?En-in , nong hopihna awging ka bil ah hong lut phetin ka gil sunga naungek kipak in a diang hi.Topa in a gensa te tangtungsak ding hi ci a,a um numei in thupha ngah ta hen,” a ci hi.
Anih un kiho in Mary in zong amatunga vantungmi gen teng Elizabeth kiangah gen in, Elizabeth in apasal Zechariah tunga thupiang teng genin Pasian min aphat uh hi.
Mary zong Elizabeth kiangah kha thum a om khit ciang in a ciah hi.
Mary in Pasian thumangin asuah hun atun dong lungdam tak le lungduai tak in ngak hi.Mary bangin ki niamkhiatna tawh Pasian thu a mang te mi hampha thupha ngah te a hi hi.
“Pasian in a bawl theihloh khat zong omlo hi”
0 Comments