ANNE DING KUA TE SAMDING
&
ANNE ONG KISAP CIANG
Luka 14:13
Anvakna pawi na bawl ciangin, mizawngte, khezawte, khebaite le mittawte sam in.
Sabbath ni khatin Farisi mihau khat in nitak anne dingin Jesuh asam hi.Tua lai ah Farisi te tampi zong pai uh a, pawlkhatin Jesuh a encik uh hi.
Jesuh in zong thukham hilh siate le Firisi mite kiangah, “Sabbath ni-in ci na damsak ding i thukham in hong hiam,khak hiam?”ci-in adongh hi.kua man dawng lo-in ki en giaugiau uh hi.Jesuh in zong tua mipa samin adamsak khit ciangin a ciahsak hi.
Tua annekna ah a kisam mite pawl khat, uliante’ tut nading munah a tut nopna uh amuh ciangin, Jesuh in a maute kiangah thu khat gen a, “Mopawi khatpeuh ah napai uh ciangin uliante’ tut nading munah tu kei un.Nangsang a zahtak huai zaw mithupi zaw ong om thei dinga,innteek pa in note kiangah, “ Natai khia phot o, hih lai ah amah tusak zaw ni,’ hong ci ding a, tuaciangin nang a nuai ah maizum pi in na tutsuk kul dinghi.
Tua sangin a tungin minautang tutna ah tu zaw lecin innteelpa hong paiciangin “Lawm aw, hih tutpah nuamah hong tuzaw in,” hong ci ding hi.Nang a dingin angtang huai mahmah ding hi.A kiliansakte khempeuh in niankhit na thuak ding uh a,a ki niamkhiat te khempeuh a lian in ki bawl ding hi.
Tua ciangin Jesuh in a innteek pa kiangah, “Anne dingin mi nasap ciangin,na vengte na sanggamte sam kei in a mau zong nang hongsam in an hong nekpih leh na anvakna thaman angah na hihi.Tua bangin annek pawi na bawl ciangin mi zawngte sam zaw in bang hang hiam cihleh Amaute in hong thukkik zolo ding uh ahih manin nang a dingin a lungdamhuai hong hi ding hi.Sihna pan in mihoihte a thawhkik hun ciangin Pasian in nang tungah hong thukkik ding hi,” a ci hi.
Jesuh in thu genteh na khat gen a, “Khatvei mi khat in pawi lianpi khat bawl in mi tampi asam hi.A nasemte kiangah innteng siangsak un la anlim pen bawl un a ci hi.Nasem te in zong mihau pa cih bangin in den uh a cna khempeuh abaih sa in akoih uh hi.
Annek hun hita a, a hi zongin kua mah pai nailo hi.Tawmvei ngak a kuamah hong pai tuanlo hi.
Tua ciangin anasempa kiangah, “ Tu-in na khempeuh abaih sa-in om khin ahih manin hong pai ta un,” ci-in akhoh sa mite asam sak hi.Nasempa zong apai pah hi.
A nasempa zong innkhat khit inn khat va pai kawikawi a,Ahih hangin a khohsa mite in apai theihloh na ding uh paulap zong ciat uh hi.Khat in, “Lo khat ka lei a,ka va et ding kisam ahih manin kong pai thei kei ding hi,”na ci hi. Alo pen et a kul hilo hi alei ma-in a etsa hia,paulap azongbek ahi hi.
Nasempa adang khat ah pai leuleu a tua pa-in, “Bawngtal kap nga ka lei a, a va sim ding ka hih manin kong pai thei kei ding hi,”na ci hi.Tua zong paulap mah a hi hi.
Adang khat leuleu in, “Ka zi ding aki la khinphet a hih manin kong pai thei kei ding hi,”na ci hi.
Aki sam khempeuh in paulap zongin kua mah apai kei hi.Nasempa zong hong kilehkik a a Topa kiang agen ciang ina topa heh mahmah hi.Amah in a lawmte tawh pawibawl in nuamsa ding a, a gel hangin kuamah pailo nuamlo hi.
Tua ciangin mihau pa in anasempa kiangah, “Khua sung kongzing khempeuh ah va pai inla,mizawng,khezaw, mittaw le khbai mite hong paipih in,”ci-in asawl leuleu hi.Nasempa zong thumang takin va pai hi.Tua te khempeuh ongpai a, ahi zong in om nading mun awng lai hi.
“Khat vei vapai lai inla,inn adim theih nadingin na muh khempeuh vasam in,”aci hi.Tua ciangin inn sungah mi hong dim hi.Tua a pai mi khempeuh in anne in nuamsa mahmah uh hi.Mihau pa innah zong apai cilna uh le hibang anlim anek cilna uh hipah a, lungdam in kipak uh hi.Mihau pa thu dik na le ama itna hangin nuamsa uh a maitak tak in pawi abawl uh hi.Tua pawi sungah kua lungdam pen ding ahih hiam?Mihaupa ama piakkhiatna hangin angtang, kipak in lungdam mahmah hi.
Tua mahbangin Jesuh in ama onggup khiatna asang dingin mikhempeuh hong sam hi.Nazawng a,nahau zongin koikoi ah na om zongin Jesuh in deidan neilo in ong it a,Jesuh in namawhna khempeuh ama sisan tawh hong sawpsiang sak zo hi.Lungdam tak a,na up nasan ding bek ahi hi.
Tua nasan Jesuh ong gupkhiatna pen midang a thei nailo te kiang gen a,na hopsawn ding a hi hi.Tangthu sunga, athu mang nasempa bangin,mi na muh khempeuh kiang Jesuh ong itna le ong gupkhat na thu igen ding hi.Jesuh in mihing khatbeek a manthan ding phallo hi.Eite in ilawmte a hi zong, Jesuh thu a za nailo a thei nailo te kiang ah gen ding tavuan a nei tek i hi hi.
0 Comments