AHUN OMLAI IN ZUANIN

AHUN OMLAI IN ZUANIN

LUKA 19:1-10

Luka 19:10

     A mangthangte a zong ding le a honkhia dingin Mihing Tapa a hong pai a hi hi.

    “A Zekai luat ma-in Zeisu na lungtangsung ah sam in”

Jerikho khua-ah zakkhias kici mihau mahmah khat om hi.Amah pen siahdong ukpa khat hi a, siahdong icih pen gammi te tungpan tax(siah) te kaikhawm in kumpi te tungah pia hi.Tua hun a siahdong te pen mite tungpan a manlo pi in alak zahding val bang la in tua a valteng a mau a dingin kem uh ahih manin a hau uh hi.Zakkhias in zong tua bangmah a hi hi.Tua a hih manin kuaman’ Pakta lo in lawm hau khollo hi.

    Zakkhias lampi khawngah a vak ciangin zong kuaman hopih ngei lo hi.A mah pen ahauh mahmah hangin lungleng kisa in nuamsa theilo hi.Inn hoih mahmah nei in a innsung zong nopci mahmah a,ahi zong in kuamah a innah hawhngeilo hi.Nitak ciangin a mah bek innhoih sung ah amah bek om in lungleng kisa mahmah hi.

      Aman’ Zeisu in itna a neihna cih te za ahih man in Zeisu munuam in lunggulh hi.

    Nikhat akhua sung uhah gamlum na khat hongom a tua bangthu hiam ci-in a ngaih leh mikhat in Zeisu Jericho khua nawk in hong pai ding hi ci in a ot naza hi.

    Amah zong Zeisu munuam  lua ahih man in tuathu azak  limin anasep nusia in hongtai pah vingveng hi.

      A hi hangin Zeisu munuam a pai mitam lua mahmah a Naupang, nupi , papi pai ngeingai uh hi. Zakkhias a tuntom mahmah khat ahih manin mi honpi lak panin Zeisu mu zolo hi.Mipi lak nawkin kihen tantan a, a mah amu pawlkhatin nang mimawhpa hi tengah bang ong hih Bahia,taikhia o Zeisu in nangbang mimawh te a ding hi kei na ci lai uh hi.

      Tua ciangin a mah zong khuadak kawikawi in,lamgei ah thei kung khat mu ahih manin tai vingveng in a theikung tungah akahto hi.Singkung tung panin Zeisu nuamtak in mu thei hi.

     Zeisu ong paisuak in Zakkhias kahna singkung nuai ah hongkhol in,atung lam ento in, “Zakkhias manlang takin hong kum suk in, na inn ah kong taam ding hi.”a cih ciangin Zakkhias zong lungdam takin tuaksuk pah in a inn ah Zeisu a tungsak hi.

Akim a om mipi te in lamdang sa uh a,haza thei mahmah uh hi. “Hih mimawh pa inn ah a pai hi.”ci-in khat le khat ki huau khuankhuan uh hi.

      Zakkhias inn ah kuamah hawhnuam ngeilo in,Kuamah in Zakkhias zong itna tawh hopih ngeilo hi.Ahi zongin Zeisu in Zakkhias it hi.Banghanghiam cih leh Zeisu in mikhempeuh it mahmah hi.I hoih laitak I hoihloh lai tak ahi zongin ongit na kiam ngeilo hi.

    A inn atun khit ciangin Zakkhias ding to in, Topa kiangah, “Topa aw ka neih sa kimkhat mizawngte tungah ka pia ding hi.Mi khatpeuh khemin a na ka laksak leh a zah li-in ka loh kik ding hi,” a ci hi.Bang in Zakkhias nuntak na khel hiam?Zeisu itna in a nuntak na buppi khel hi.

      
        Tua ciangin Zeisu in, “ Tuni-in hih innkuan inhotkhiatna a ngah hi.Hih mipa pen Abraham’ suan te khat zong hi lai hi.Bang hang hiam cih leh a mang thang te a zong ding le a honkhia dingin Mihing Tapa a hongpai a hi hi .” a ci hi.