MITTAW PA’N KHUAMU TA

               MITTAW PAN KHUAMU TA 

                               ( John 9:1-41)

LATE 107:8

Ama itna kip le mihing tate tungah a lamdang ama sepna te hangin amaute in TOPA’ tungah lungdamna ko ta uh hen.  

“MIDANG KHAT AHUH PA PEN,HUHNA A NGAHPA SANGIN LUNGDAM ZAW”

           Zeisu in cina tampi damsak hi.Galilee pan in Jerusalem ah pawisim in pai a, Biakinn sungah, a thungenna hangin Jew mi pawlkhat in suang tawh den sawmuh ahih manin Zeisu ki hemkhia hi.

          Biakinn sungpan a paikhiat  ciangin a pianpih mittaw mi khat a mu hi.Tua pa in,pak hoih tuamtuam te le leitung hoihna khatvei zong mukha ngeilo hi. A nu mel nangawn mungeilo hi.Zeisu in tua mittaw pa hehpih huai sa mahmah in tua lai ah ong khawl vat hi.

          A nungzuite in “Sia aw,hih pa a mittawtna ama mawhna hang ahi hiam,a nu a pate’ mawhna hang ahi hiam?” ci-in adong uh hi.Zeisu in kua ma mawhna hang hilo in,Pasian vangliatna akilat thei nadingin a mittaw a hi hi.ci in a dong hi.

         Tua ciangin Zeisu, awnsuk in buan la a, tua mittaw pa’ mit ah a nuhsak kawmin, “Siloam Bual-ah na mai va phiat in,” ci- in a sawl hi.

       Mittaw pa zong naupang bangin um pah in, Zeisu sawl bang mangin khuamu  ta ding cih lamen na tawh,dingkhia in apai pah hi.Siloam Bual a tung ciangin tusuk in a mai aphiat pah hi.Amai aphiat khit phet in khua mu pah ahih man in Lungdam lua in khua mu thei sa-in  hong paikik hi.

          Amah zong lungdam lua ahih man in ongtai pah in mikhempeuh kiangah a mah a kidamsak na thu a gen hi.

Amah amumu ngei te in lamdang sa mahmah uh a, pawlkhat bangin um zolo in hih pa mi dang hi mittaw pa tawh aki sun bek hi ci liang uh hi.

         

         Amaute in, “kuan hong damsak a,amah koi ah om a hi hiam?”ci-in dong uh a, amah in “Zeisu aki ci mipa in ong damsak hi.A mah koi ah om cih ka theikei hi.”ci-in adong hi. 

      Zeisu na lamdang bawl athei uh ciangin Farisi te heh mahmah uh hi.Bang hang hiam cih leh tua ni pen Sabbath ni hi a,Farisi te in Zeisu in Sabbath tanglo in mi adamsak pen khial hi ci-in mawh sak uh hi.Zeisu pen khial ngeilo hi.Nisim in nahoih sep ding hi zaw hi.

          Tua ciangin Farisi te in mittaw ngei pa sam in, “na mit khua hong musak kua ahi hiam?” ci- in adong uh hi.Amah in, “Tua mipa in ka mitah buan hong nuh a,ka mai ka phiat leh khua ka muthei hi,”a ci hi.

       Tua ciangin  amaute khat le khat ki ho ngeingai in hih mipa a mittaw ngei hinapi-in tu-in khua mukik thei hi, cih pen um thei lo uh hi.

       Tua ahih  manin a mittaw pa’ nu le pate sam uh a, “A pianpih a mittaw na cih uh na tapa uh hih pa mah ahi hiam?” ci- in adot uh ciangin a nu le a pate in, “ hi mah hi.A hi zongin bangci- in khua mu thei hiam cihna le kua in khua mu sakthei hiam cih ka thei kei uh hi.” ci- in a dong uh hi. Bang hang hiam cih  leh Zeisu pen Khrih hi, ci-in agen peuhpeuh,  kikhop na inn panin hawlkhia ni, ci-in Jew mi uliante in thukim uh ahih manin,Jew mi ulian te akihtak na uh hangin hi bang in agen uh ahihi.Tua ahih manin a nu le a pate in, “Amah naupang hinawnlo ahih manin amahmah dong un,” a ci uh hi.

        

        Tua ciangin amittaw ngei pa kiangah, “Pasian mai ah kiciamin a man taktak hong gen in.Kote in hih mipa thukham palsatin agamta pa hi ci- in ka thei uh hi,”a cih uh ciangin amah in, “Amah agamta khial maw khiallo ka thei kei hi.Keima theih thu in: nidangin a mittaw kimlai, tu-in khua ka muthei ta hi,” ci- in a dawng hi.

        “Amah in kei khua hong musak thei napi, amah koi pana hong piang ahi hiam cih na theih loh uh lamdang mahmah hi.Leitung piancil a kipan pianpih mittaw khua amusak thei a omlam kiza ngei nailo hi.Tua ahih manin Pasian kiangpan hong pai hi kei leh hih bang hih theilo ding hi,”ci-in a dawng hi.Tua ciangin  amaute in, “ mawhna bulomtang sung panin suakin akhang khia mipa in kote tungah thu hong hilh sawm nahi hiam ci-in Tua mittaw ngei pa a bawl khia uh hi.Cikmah in kikhop na inn ah hong pai nawn kei in a ci uh hi.

        

       Mittaw ngeipa tung a thupiang Zeisu in za ahih manin amah amuh ciangin, “Pasian Tapa, Zeisu na um hiam?” ci-in a dong hi. Mittaw ngei pa in, “Zeisu kua cih ka thei kei hi, a mah thei leng it in a thu ka mang ding hi.” ci-in a dawng hi.

    Zeisu in, “ kei mah ka hi hi.”Tua ciangin mittaw ngeipa lungdam mahmah kawmsa in Zeisu en a, “Topa aw,ka hong um hi,” ci- in kun in abiak hi.

         
     Tua ciangin Zeisu in, “ Mittaw te in khua a muh theih nading le khua mu thei a kineihte mittaw a bat theih nading in lengtungah thukhen dingin a hong pai ka hi hi,” a ci hi.

    Mittaw pa Zeisu in it in hehpih ahih manin midangte mah bangin khua musak a,thu bek thamlo in Zeisu Pasian Tapa ahih na zong amuh theih nang in akhamit zong hongsak lai hi.

    Mittaw pa Zeisu in it in hehpih in mit khua amuh sak mah bangin, Zeisu in nangzong hong it in hong lungdam sak nuam  hi.

     Mittaw pa in Zeisu sepsak a lungdam na mikhempeuh kiangah agen mah bangin,nang’ zong nisim a Zeisu hong itna hong sepsak na na pulak a mite lak ah a gengen ding in Topan thupha hong pia ta hen.