ZOMI SUNDAY SCHOOL

         NAUPANGNO KHATIN ZEISU HUH

                     (Tul nga vakna)

Luka 6:38

          Midangte tungah pia un.Tua hileh Pasian in note tungah zong hong pia ding hi.

         “Pasian in mi khempeuh itin hehpih”

     Galilee gam kiim a om khua te pan in,Zeisu nalamdang bawl te a mu ding le a thugen te a ngai dingin mi tampi ong pai  ziahziah uh ahih manin a annek hun ding le a tawlngak hun ding zong om manlo hi.Zeisu in a nungzui te kiang ah “Ei guak i om theih nading in munkhat ah paikhia ni;Tua lai ah na tawlnga thei ding uhhi,”a ci hi.

        A nungzui te zong thukim in Peter’ gunkuang tungah tuang in tua munpan in gamdaih namun zuanin a paikhia uhhi.A hi zongin apai khiat lam uh mi tampi in thei uh ahih manin khuapi khempeuh pan in a hong pai mite leilam tawnin na pai uh a, Zeisu le anungzui te tun ma-in a na matun uh hi.

       Laisiangtho sungah Zeisu in, amaute acing omlo tuute tawh kibang sa ahih manin a khasiat mahmah hi. Zeisu in mite kisap na le mite ngaihsut na te ongthu sim in ong it mahmah cih kimu hi.Tua mipi te in Pasian lunggulh in Pasian ong itna thu te za nuam mahmah hi.

       Zeisu thugen thugen hong kipan a, amau te in Zeisu thugen khempeuh zaknop sa mahmah uh hi.

        Tua te lak ah naupangno te zong tampi kihel hi.Amau sun an ding pua in Zeisu thugen ngak uh hi.

         Naupangno khat zong Zeisu thugen ngai ding lawp mahmah in kigawm a, anu in sun an aguan hi.

          
      Zeisu zong a mualtung lamah khah to-in a nungzui te tawh a tu khawm hi.Zeisu khuadak a,ama lamah mihonpi hong pai muaimuai a muh hi. A mau te in Zeisu thugen zaknop sa lua ahih man in a gilkial lam nangawn uh mang ngilh uh hi. 

           Zeisu thugen a ngai mi tam lua mahmah ahih man in Zeisu a muh nading un naupang pawlkhat bang singtung ah in a ngai uh hi.Tua lak ah ama sun an ding apua naupangpa zong singtung kah nuam ahih man in Zeisu nungzui Andrew in a huh hi. 

          Nitak lam ong hita a, mi khempeuh a gilkial hun ta hi.Naupang pa in sun an apuak hangin midang tampi ten bang mah pualo uh hi.

      Nitak lam ciangin anungzuite in Zeisu kiangah, “Tu-in nitak hita a,Hih lai mun lah gamlak a hih man in an omlo hi. Hih kiim a om khuate ah amaute pai-in a annek ding uh a lei nadingin hih mihonte sawl khia in,”a ci uh hi. 

      Zeisu in Filip kiangah,“a maute nei ding bangkhat peuhpeuh pia un” a ci hi.Tua ciangin Filip in “hilai ah ngun peek zanih om hi.Tua tawh anlum va lei-in amaute’ nek dingin pia ding ka hi uh hiam?”ci- in a dawng hi.Tua ciangin Zeisu in “Anlum bangzah nei na hi uh hiam?”a ci hi.

          Tua Zeisu dotna Andrew in azak ciangin, “Mipi te lakha naupang khatin anlum nga le ngasa tawn nih nei hi” ci in agen hi.

            
          Zeisu in “tua anlum le ngasa ong paipih unla, mihonte a phuaihphuaih in tusak un”Tua ciangin Andrew zong pai in naupang no kiangah mi khempeuh in inek khop dingin na sunan nongpia thei ding hiam? Acih ciangin naupang in zong lungkim takin pia pah hi. Andrew in Zeisu kiangah paipih pah hi.

          
          Tua ciangin Zeisu in anlum nga le ngasa tawn nih la-in vantung lam ento in Pasian tungah lungdam na ko-in balnen a,mite tungah a lui dingin anungzuite tungah apia  hi.

           A nungzuite in zong lungdam tak in a hawm uh hi.Mi khempeuh in a duh zahzah uh ne uh hi.Zeisu in nungzuite kiangah a ki khamval teng kaikhawmeun ci in a sawl hi.

         Tua an ane te sung pan in numei le naupang pali pasal cing teng 5000(tul nga) bang ahi hi.Amau zong Zeisu cih bangin mi khempeuh in ne-in a khamkhit uh ciangin,anungzuite in akikhamval teng khawm uh a,paipel sawm le nih a dim hi.
          

           Tua ciangin nungzui te in ei a ding bek ngaihsun lo in mizawngte le mi cimawh te huh ding a thak in hong phawk uh hi. 

       Tua ahih manin midangte tungah pia un.Tua hileh Pasian in note tungah zong hong pia ding hi. Bang hang hiam cih leh midangte na piakna uh tawh ki zui-in a henhen,a tahtah,a dimletin Pasian in note tungah hong pia ding hi.(Luka 6:38)