EASTER EGG THU TAWM KHAT

               EASTER EGG

            (hong piankhiat na )

                 

        Easter cih pen Ishtar akici milim(biakna namkhat te i nusian) biakna khat pan hong kipan khia hi a, (pagan upna) tawh kisai ciapteh na namkhat a hihi.

       Nidang lai in Easter pawi pen phalbi abei khuakhal hun hong tun ciangin akibawl hi in German le Europe cih gam pawl khat in Easter pawi le zeisu thawhkik ni ahun kibang a,abawl uh ahihi.

   

 Hih Easter egg le Easter bunny cih te bang hang in Thawhkik ni-in ki zang a bang adeih na hiam?cihpen ei ading in alamdang le i theihngei hetloh khat a hihi.Nidang in (i neulai in)i thei kha ngei kei a,ahizong in khuahun khantoh na tawh ki zui in tuhun ciang migam milei ah itun tak ciang Topa Zeisu thawhkikni in Easter egg te Easter bunny cih te pen sai khempeuh ah kizuak in naupang ten bang sang khawng pan hong pua in hih hun sungteng pen munkhempeuh phial ah i mu hi.

      Hih pen banghang ki zang a thawhkikni tawh aki sai na bang om hiam?cih thei hetlo in kum tampi mah naupang te nopsak nangin leisak in ka zat pih zel hi.Ahi zong in ka kankan ciang in hih Easter egg le Easter bunny cih te pen ishtar kici (nusian)i ciapteh na khat na hi ci-in lai ah ka sim kha hi.Adaupai nang le alawhcin nang un biakna in tua aktui te apaipih uh hi na kici mawk hi.

      Pawlkhat leuleu in aktui pen ahawng, adaa(ahawng le atui cik kikal a, akaang pen), atuicik cih bang in thuapthum pum khat ah om khawm a, tua pen in Pa,Tapa,Khasiangtho  thumgawm Pasian cih alak nopna in akizang hi aci zong  om hi.

      Ahi zongin,hih atung athu te ngaihsun khawm  leng Easter egg,Easter bunny cih pen milim biak na pan hong kipan ahih man in eithu um mi(Christian )te tawh  aki sailo cileng zong kikhial lo ding in ka um hi.Ahizong in gam khangto te ah ki nak zat mahmah a tua pen naupang te kiang ah zanglo ding ci a,ikhak tan gawp ding leh eitawh kisak lo hi ci a kham tentan ding lah ong hilo zel hi.Tua ahih man in athu hoih tak gen in i hilh cian ding aki sam mahmah khat hong suak hi. Tua hi a koi pan ongpiang koi pan kipan cih te zong thei kawmsa in ahoih lam in zanga,i lah khiat thei ding ahihi.

   

  Hih kong at deudau teng pen keizong theipen le tel pen ing ci a hong at ka hi  kei a,kei dan a athei nailo khat le nih ading phat tuamna a om leh ci-in  ka laisim na tungtawn in hong at kik ka hi zaw hi.keizong thei nuam mahmah leh ka kankan atheih huai thu khat zong ahih man in phattuam na ongpia ding in zong ka lam en hi.I theih ngei nai loh lah aki zang mahmah na khat peuhpeuh pen kantel in tua khit ciang zang leng pen naupang te kiang igen dan zong anuam mahmah ding le akisam zong ahihi.Ahi zongin sandan leh gen dan zong ki banglo thei hi.

       Lam khat pan in gen lehang tui (egg 🥚) i cih limlim pen nuntak nathak athak nuntak na ci-in zong ki gen thei hi.I Topa zeisu,sih na in len zolo in hansung pan hong tho kik a,alui nuntak na pan athak nuntak na ah ( Zeisu luang akitun na puan bek om in  amah ahih leh nungta kik khin hi)tua nuntak na thak etsak na cihdan in zong ki la thei hi.(alui nate ki khel a, athak apiang zo hi.)Tua pen naupang te gen a itel sak ding akisam thu khat ahihi.(Laisiangtho sung ah omlo a tel theih ding a gen na hi cih zong theih sak huai hi.)

        Hih lai asim kha peuh in no theih dan le sandan zong comment ong at ciat un cih ong zawn nuam ing lungdam.