NA PIANMA IN NANG ADING AHOIH PEN KI BAWL KHIN

                                                

LESSONS 1: Piansakna

         

(Pasian in eite ading na khempeuh hong bawlsak hi. Ama bawlsa na hoih te tawh hong itna hong lak hi)

laisiangtho kamngah,

           Piancil 1:1 

                     Aki patcil in  Pasian in 

                     vantung leh leitung 

                     apiangsak hi.

               Aki patcil in Leitung in limleh mel nei lo in a awngthawl pi hi ci.Tuipi tung teng khuamial bikbek in,tua tuitung ah Pasian kha in na asemhi.Na khempeuh a piangsak thei Pasian in nang le kei i om ma-in ngimna khat tawh eite om nang hong bawlsak khol hi.

 

1.Ni 1 ni 

       Pasian in "khuavak  om hen"ci-in khuavak hong ompah hi.Pasian in khumial sung pan in khuvak khenkhia in, tua khuvak pen sun ci-in khuamial pen zan cihi.Pasian in nang ading, naupangte innpua ah aki mawl theinang sun khuavak bawl a, gimlo a,na tawl ngak hun ding zan khuazing hong bawl sak hi.

Pasian in tua pen hoih mahmah hi ci-in mu hi.Nipi kalkhat sungah ani khat ni a Pasian piansak a hi hi.

 

2.  Ni 2 ni,

     A ni nih ni ciangin Pasian in "tuite' laizangah vankuumpi om hen la,tua vankuumpi in tui leh tui kikhen sak hen,"ci-in tua mah bang in ong piang pah hi.Pasian in vankuumpi pen "vantung"ci hi.

3. Ni 3 ni

    Tua ciangin tuite bek omkei henla mihing te nuamtak agamtat theih nang leh singkung lopa paakte a om theih nangin leikeu zong om leh hoihding hi cih ngaksun a,  Pasian in "vantung nuai- a om tuite mun khat ah kikaikhawm henla, lei keu ki dawk hen"cihi.tua mahbang in piang pah hi. Pasian in leikeu pen "leitung" ci a,aki kaikhawm tuite pen "tuipi" cihi.Pasian in “lei tung in kung tuamtuam te piangsak hen”ci-in singkung hoih nono,pak namkim,gah anei singkung namte, angah sungah tang anei singgah tuamtuam cihbangin anamkim piang pah hi .Pasian in tua pen hoih hi ci-in mu a, alungkim mahmah hi.

 4 .Ni 4 ni

     Pasian in sun leh zan akhen ding in vantung ah khuavak lian nih bawl a,khuavak alian zawpen sun a uk ding (ni),khuavak aneu zawpen zan auk  ding (kha) leh aksi te zong abawl hi. Pasian in tuapen hoih hi ci-in mu a,Pasian a lungkim mahmah hi.

5. Ni 5 ni 

                Pasian in tuipi sung ah agamtang ding tuisunggan hing nam tuamtuam te leh huih lak ah alengding kha anei vasa te amau namciat in apiangsak hi.Pasian in tuapen hoih hi ci- in muhi.Pasian in amaute thupha pia a cipha in tampi pha un acihi.

 

6.Ni 6 ni

               Pasian in leitung ah agamtang ding nuntak na anei ganhing tuamtuam te,innsa,gamsa leh abokvak ganhing te amau namciat in apiangsak hi.Pasian in tuapen hoih hi ci-in muhi.

 

           Pasian in "Ei malim eimah hongsun in, mihing bawlni" aci hi.Tua ahih ciang in Pasian in ama tawh akisun in numei leh pasal abawl hi.Amah in amau te thupha pia a "cipha in tampi pha unla leitung dim in zo un, tuipi ngasa te tung,huihlak vasa te tung leh leitung ah nuntak na anei ganhing khempeuh te tung ah ukna nei ta un," acihi. Pasian in abawlsa mihing te tung ah "leitung a piang, ngah a nei khempeuh note tung ah kong pia hi tua te an in nanei ding uhhi."acihi. Tua mahbang in apiang pah hi.Pasian in abawlsa na te en in hoih mahmah hi.

7. Ni 7 ni

                Ni sagih ma in piansak nasep khempeuh ki zokhin a,ni sagih ni-inPasian a tawl nga hi.Pasian in ni sagih ni thupha pia in siangtho sak hi.

ATOMIN

   Ni 1 ni khuavak leh khuamial

   Ni 2 ni vantung

   Ni 3 ni tuipi,leikeu leh singkung lopa

   Ni 4 ni ni,kha leh aksi

   Ni 5 ni tuisung ganhing leh huihlak vasa     

   Ni 6 ni innsa,gamsa,abokvak ganhing te  

           le mihing

   Ni 7 ni tawlnga